Málstefna Tónlistarskóla Árnesinga
samþykkt á starfsdegi 19. ágúst 2024

Málastefna Tónlistarskóla Árnesinga byggir á:
1. Lögum um stöðu íslenskrar tungu og íslensks táknmáls, nr. 61, 7. júní 2011 og
2. Íslenskri málstefnu 2021-2030, samþykkt 6. september 2021.

Stefna
Tónlistarskóli Árnesinga þjónar stórum hópi nemenda innan allra sveitarfélaga Árnessýslu. Hann miðlar tónlistarlegri þekkingu til nemenda á öllum aldri og hefur því mikilvægu samfélagslegu hlutverki að genga. Málstefna Tónlistarskóla Árnesinga tekur mið af þessu. Skólinn leggur áherslu á að efla faglega umræðu um tónlistarkennslu á íslensku, samhliða því að miðla á íslensku þekkingu til samfélagsins alls.

Íslenska er samskiptamál skólans, bæði sem talmál og ritað mál, hvort sem er í kennslu eða stjórnsýslu.
Mál það sem notað er í Tónlistarskóla Árnesinga skal vera vandað, einfalt og skýrt.
(8. og 10. gr. laga um stöðu íslenskrar tungu og táknmáls).

Tónlistarskóli Árnesinga gerir þær kröfur til starfsmanna sinna að vera til fyrirmyndar um notkun íslensku í kennslu.

Nemendur skulu fá kennslu á íslensku. Með því að tala íslensku í kennslustundum styðja tónlistarskólakennarar við máltöku og málþroska barna.

Framkvæmd og útfærsla
1. Íslenska er samskiptamál skólans. Á það við um talað og ritað mál í samskiptum við nemendur, foreldra, kennara, annað samstarfsfólk og stjórnsýslu.

2. Kennt er á íslensku. Í kennslu eru kennarar hvattir til að ræða við nemendur sína um þýðingar á einstökum hugtökum úr erlendum tungumálum, svo sem ítölsk tónlistarheiti.

3. Erlendir starfsmenn Tónlistarskóla Árnesinga eru hvattir til að sækja námskeið í íslensku og tileinka sér tungumálið. Upplýsingar um íslenskunám má m.a. finna á heimasíðu Fjölmenningardeildar Vinnumálastofnunar: https://mcc.is/is/ad-bua-a-islandi/menntun/islenskunam.
Áhersla er lögð á að erlendir kennarar kenni á íslensku eins fljótt og auðið er og efli um leið orðaforða sinn á kennslufræðilegum og tónfræðilegum hugtökum.

4. Íslenskumælandi kennarar tali íslensku við erlenda kennara. Þetta er mikilvægur liður í að þeir nái tökum á íslenskunni. Með samræðu eykst orðaforði og þeir styrkjast sem einstaklingar í íslensku samfélagi.

Umsjón og ábyrgð
Skólastjóri ber ábyrgð á málstefnu Tónlistarskóla Árnesinga, en framkvæmd er á ábyrgð allra starfsmanna skólans.