Tónleikahald

Framkoma á tónleikum er mjög mikilvægur hluti tónlistarnáms og miðað við að hver nemandi komi fram á tónleikum/viðburðum a.m.k. tvisvar yfir skólaárið.

Tónlistarnám snýst ekki hvað síst um að þjálfast í að leika fyrir áheyrendur. Það er því mikilvægt að fá tækifæri til að koma fram bæði sem einleikarar og í hópum svo upplifunin verði jákvæð. Markmiðið er að nemendur njóti þess að flytja tónlist og gefa af sér í tónlistarflutningi.

Tónleikahald er með fjölþættu sniði í Tónlistarskóla Árnesinga. Í listanum hér á eftir má sjá helstu tónleika sem haldnir eru á hverju skólaári:

Haust- og vortónleikar. Hver kennari heldur tónleika haust og vor með sínum nemendum. Á þessum tónleikum fá nemendur grunnþjálfun í að koma fram, þ.á.m. að ganga á svið, æfa hneigingar, flytja tónlist og jafnvel kynna sín verk.

Deildatónleikar eru haldnir í nóvember ár hvert. Tónleikarnir eru sjö og skiptast upp eftir deildum: blásaradeild, blokkflautudeild, gítardeild, strengjadeild, rytmísk deild, píanódeild og söngdeild. Á tónleikunum er hljómsveitum, samspilshópum og öðru samspili gert hátt undir höfði og því mikill fjöldi nemenda sem kemur fram á deildatónleikum.

Jólaspilamennska í desember er fastur liður starfseminnar. Nemendur fara með kennurum sínum „út í bæ“ og leika fyrir samborgara. Má þar nefna elli- og hjúkrunarheimili, leikskóla, á jólaböllum grunnskólanna, á fundum félagasamtaka, vinnustofum og vistheimilum fatlaðra, í verslunum og víðar.

Svæðistónleikar eru haldnir í tenglsum við Dag tónlistarskólanna 7. febrúar. Svæðistónleikar eru sjö talsins og skiptast eftir svæðum: Vestan Hvítár (nemendur úr Bláskógabyggð og Grímsnes- og Grafningshreppi), Austan Hvítár (nemendur úr Hrunamannahreppi, Skeiða- og Gnúpverjahreppi og Flóahreppi), Ströndin (nemendur frá Stokkseyri, Eyrarbakka og Þorlákshöfn), Hveragerði (nemendur úr Hveragerði og nágrenni), Selfoss (tvennir tónleikar með nemendum frá Selfossi).

Nótan (uppskeruhátíð tónlistarskóla á landsvísu) er haldin í mars/apríl. Hver skóli tilnefnir tónlistaratriði til þátttöku á svæðistónleikum Nótunnar (Suðurland, Suðurnes og Kraginn er okkar svæði). Valin atriði af svæðistónleikum eru flutt á lokatónleikum Nótunnar.

Vínarbrauðstónleikar strengjadeildar eru haldnir annað hvert ár í byrjun maí. Á tónleikunum koma fram báðar strengjasveitir skólans, allir Suzuki-strengjahópar auk smærri samspilsatriða.

Píanó-hringekjutónleikar er nýjung í skólastarfinu. Á þessum tónleikum leika píanónemendur fjórhent og sexhent lög, sem er spennandi fyrir nemendur sem alla jafna eru í einleikshlutverki.

Skólaslit eru haldin á 10 kennslustöðum í maílok með tónlistarflutningi og afhendingu prófskírteina. Skólaslitin eru með ólíkum hætti og fer dagskrá eftir fjölda nemenda. Á minnstu kennslustöðunum koma allir nemendur fram og eru skólaslitin þá um leið vortónleikar nemendanna. Á stærri kennslustöðum eru valin atriði flutt sem sýna þversnið kennslunnar, bæði samleiks- og einleiksverk. Á Selfossi koma nær eingöngu fram hljómsveitir og samspilshópar og atriðin fá, enda margir sem fá afhent skírteini. Dagskrá skólaslita er alltaf hátíðleg og mikil uppskeruhátíð á hverjum kennslustað.

Annar tónlistarflutningur og mót. Auk ofangreindra fastra liða á skólaárinu, taka nemendur þátt í ýmsum viðburðum innan og utan skólans. Má þar nefna Ungsveit sinfóníuhljómsveitar Íslands, sinfóníuhljómsveit tónlistarskólanna, landsmót af ýmsu tagi (lúðrasveita-, strengja-, blokkflautumót o.s.frv.), tónlistarkeppnir o.fl. o.fl.